Opisyal sa PDEA-7 gisuspenso

CEBU, Philippines- Gisuspenso og unom ka bulan ug wala’y madawat nga sweldo ang kanhi Officer In-Charge ug karon deputy director sa Philippine Drugs Enforcement Agency (PDEA)7 nga si Esperidion Javier.

Kini human namatud-ang sad-an sa kasong administratiba dihang kini nanghagit og pinusilay sa usa ka sakop sa media nga si Guamittos Logroño sa sibyaanang DySS  siyam na ka bulan  ang nakalabay.

Ang maong order pinirmahan sa director general sa PDEA, Usec. Arturo Cacdac, niadtong Agosto 15, 2014.

Sa unod sa desisyon sa maong hukom, napamatud-an nga guilty sa kasong “simple misconduct” and “conduct prejudicial to the best interest of the service” si Javier.

Si Logroño kinsa maoy mipasaka sa reklamo batok ni Javier, mihangop sa maong desisyon ug matud pa wala na kini magtoo nga duna pa ba’y hustisya siyang makuha ma’y labot na sa maong isyu.

“Dako ko og pasalamat nga for almost 9-months na served na gyud ang hustisya against ni Esperidion Javier, ampo lang sa Ginoo nga unta malamdagan si Javier ug professionally ma-accept niya kini nga desisyon,” matud pa ni Logroño.

Aminado si Logroño nga nagpabilin gihapon ang iyang kahadlok, lakip na sa iyang pamilya, gumikan wala kini masayod sa hunahuna ni Javier nga matud pa klaro kaayo nga nasuko kaniya.

Gipasalamatan ni Logroño ang mga opisyal sa kaulohan sa PDEA nga mipagawas sa maong hukom kay nagtoo man siya nga wala na’y kapaingnan ang iyang reklamo human sa daghang taktika nga gihuhat sa kampo ni Javier.

Samtang ang presidente sa grupo sa mga tigbalita sa kapulisan Defense PNP Press Corps (DEPP) Chito Aragon, mipadayag nga ang pagpangayo og pasaylo ni Javier wala nagpasabot nga dili na interesado ang sakop sa mga tigbalita nga disiplinahon ang maong opisyal.

Matud pa ni Aragon nga isip usa ka public official, duna’y tulubagon si Javier sa katawhan, lakip na sa mga sakop sa media nga naay lehitimo nga reklamo batok kaniya.

Gipasabot ‘sab ni Aragon nga ang maong hukom batok ni Javier usa ka kadaugan batok sa mga tawong naa sa gahom nga gustong moyatak sa katungod sa pagbalita.

“Simple kaayo ang panawagan sa Defense –PNP Press Corps, i-implement ang desisyon sa IAS, or we are asking the immediate transfer of Javier kay nagpadayon ang kahadlok ug kabalaka nato,” panapos nga pamahayag ni  Aragon. - /EIM) (BANAT NEWS)