Balamban cityhood giduso ni Gwen

CEBU, Philippines - Pormal na nga giduso ni Kongresista Gwendolyn Garcia ang balaudnon nga maghimong siyudad sa lungsod sa Balamban sa ikatulong distrito sa Probinsiya sa Sugbo.

Ang House Bill No. 4515 giduso aron mahimong usa ka siyudad ang Balamban ug mapalig-on ang pas-pas nga pagsaka sa ekonomiya mugna sa dakung buhatanan og barko sa lungsod nga mao ang Tsuneishi Heavy Industries, (Cebu) Inc. (THICI).

Ang Balamban adunay 337 kilometros kwadrado nga gilapdon nga gilangkuban sa 28 ka barangay ug adunay populasyon nga 71,237 niadtong 2010 nga census ug kita gikan sa lokal nga buhis nga kapin sa P126.5 milyones sa maong tuig.

Niadtong 2011, ang igsoon ni Garcia nga si kanhi kongresista Pablo John Garcia niduso sa susamang balaudnon apan wala kini mapasar sa Kongreso.

Kini ang hinungdan nga gipadayon ang maong tinguha ni Gwendolyn kinsa daan na nga kusganong nisuporta sa lakang niadtong siya usa pa ka gobernador.

Silang Bokal Alex Binghay ug kanhing kauban, Caesar Ian Geronimo Zambo, miduso sa lakang dihang gipasar sa hunta probinsiyal ang ilang resolusyon nga nag-awhag kang Pablo John nga moduso og balaudnon sa paghimong usa ka siyudad sa Balamban. (BANAT NEWS)