Madrigal ngadto sa publiko: Ayaw mo kadismaya
CEBU, Philippines - Human buhii ang trak nga nagkarga og 5,000 kilos nga mga silik sa iho niadtong adlaw’ng Sabado, giawhag sa Provincial Anti-Illegal Fishing Task Force ang katawhan nga magpadayon gihapon sa pag-report sa kalihukan nga maglambigit sa mga iho.
Matud ni Loy Anthony Madrigal, hepe sa maong task force, nga aduna’y mga dokumento nga nagpakita nga naggikan ang maong mga silik sa iho sa Spain ug i-export unta ngadto sa Hong Kong.
Gibuhian ang trak human sa pagkasikop niini human nasuta nga ang karga silik sa “blue sharks” nga wala nalakip sa ordinansa sa probinsya nga nagprotektar sa mga endangered species.
Si Madrigal nagkanayon nga nadawat nila ang sumbong gikan sa mga nagpakabanang katawhan nga aduna’y mga binulad nga mga silik sa iho nga ilang gituohang mga endangered.
Dugang niya nga bisan pa man og gibuhian na ang trak apan nagkuha gihapon siya og tulo ka silik aron ipasuta sa mga eksperto ugmang adlawa.
Nasikop ang maong trak sa Marcelo Fernan Bridge niadtong Sabado. Ang mga silik sa iho mahimong gamiton nga “shark fin soup.”
Si Madrigal miawhag usab sa pagpasar na sa ordinansa nga mo-amenda sa Provincial Fisheries and Aquatic Resources Ordinance of Cebu.
Sulod sa maong pag-amenda, gidili na ang pagdakop, pagbaligya, ug pag-transport sa bisan unsang matang sa iho. (BANAT NEWS)
- Latest
