Lalaki giluba sa maguwang

CEBU, Philippines - Patay ang usa ka lalaki nga giluba sa iyang maguwang kagahapon sa alas 4:00 sa kadlawon sa Lower Kawayan, Sambag 2, dakbayan sa Sugbo.

Ang namatay naila nga si Raymond Buyoc, 23, samtang ang nakapatay kaniya mao ang iyang maguwang nga si Roland Buyoc, 36.

Base sa imbestigasyon sa kapolisan nga gibadlong sa maguwang ang iyang manghud tungod sa kahubog.

Apan nasuko hinuon ug nanghagad og sinumbagay hinungdan nga nagkagubot ang managsuon.

Human sa pagbinayloay og kumo, gikatahong milakaw ang maguwang apan dihang miagi sa iyang tungod ang iyang manghud, iya kining gidunggab sa dughan sa pipila ka higayon.

Daling gidala sa mga kaliwat ug sa mga silingan ang biktima sa Vicente Sotto Memorial Medical Center apan gideklarar nga dead on arrival.

Ang suspetsado nasikop ni PO2 Jan Warren Cantay ug kaubanan sa Fuente Police Station.

Narekober sa kapolisan ang kutsilyo nga nagkadugo pa nga gituohang gigamit sa suspetsado sa pagdunggab sa biktima.

Natanggong ang suspetsado sa Fuente Police Station detention cell samtang nagpaabot pa ang kapolisan sa desisyon sa pamilya sa biktima sanglit managsuon ra man sila ug ang suspetsado. (BANAT NEWS)