CAIB padugangan ang gahum

CEBU, Philippines - Ang mga tagdumala og printing company, apil ang media, giawhag nga mutambong sa gikatakda nga public hearing adto sa City Council sa gisugyot nga ordinansahon nga maghatag og dugang gahum sa Cebu City Anti-Indecency Board (CAIB).

Usa sa gisugyot ni Konsehal Leah Japson mao nga himoan og kausaban ang City Ordinance 1408  aron dili na manginahanglan og court order kon manakmit ang CAIB og hilas nga mga basahon.

Tumong ni Japson nga pinaagi sa paghatag og dugang ngipon sa CAIB malimpyo ang dakbayan sa mga malaw-ay nga basahon, digital video discs ug uban pa.

Apan si Konsehal Gerardo Carillo nga usa ka abogado nakapanglantaw nga mora’g subra na ang gahum nga ihatag sa CAIB kay ang hukmanan ra ang may katungod nga motimbang-timbang kon ang basahon maisip na ba nga malaw-ay. Tungod sa nagkadaiyang opinyon sa mga konsehal, nauyonan nga ipahigayon ang public hearing unya sa Oktubre 8 aron imbitahon ang mga representate sa simbahan, eskuwelahan, mantalaan ug ubang mga nagpakabanang indibidwal.

Si City Administrator Lucelle Mercado nga maoy pangulo sa CAIB miingon nga angay gayud nga palig-unon ang kampanya batok sa mga malaw-ay nga kalihukan apil na ang mga basahon.  (BANAT NEWS)