RESU-7: Daghang HIV carriers mga drug users

CEBU, Philippines - Gitug-an sa Regional Epidemiology and Surveillance Unit (RESU) sa  Department of Health (DOH-7) nga mga drug users mao ang nakapasaka sa gidaghanon sa natakbuyan sa sakit nga Human Immunodeficiency Virus (HIV) dinhi sa Central Visayas.

Sigon pa sa pangulo sa Regional Epidemiology and Surveillance Unit (RESU) sa DOH-7 nga si Renan Cimafranca, naggikan kini sa siyudad sa Sugbo.

Sagad kanila nga nadiskubrehang adunay HIV miangkon tiggamitan og giabusohang regulated drug Nubain (Nalbuphine Hydrochloride) nga migamit og kontaminadong dagom sa injection.

Partikular nga gitumbok ni Cimafranca ang Barangay Kamagayan sa siyudad nga nabaniog na kaayo sa ilegal nga drugas, nubain ug prostitusyon.

Sigon pa ni Cimafranca nga base sa record sa ilang buhatan, ang mga natakbuyan sa HIV niangkon nga migamit sila og dagom nga ginamit na sa uban sa pagturok nila og nubain.

Dugang pa niini nga sa pagkakaron padayon pa silang nag-update sa ilang records sa mga tawo nga natakbuyan sa HIV dinhi sa Central Visayas.

Di pa lang dugay gibuksan na ang usa ka Sexually Transmitted Disease (STD), HIV-AIDS testing center diha sa maong barangay nga gisuportahan sa World Bank ug Asian Development Bank nga diin dunay gipanghatag nga libreng syringes sa tuyo nga kung di man kapugngan sila paggamit og drugas, bisan sa mao na lang nga paagi maputol na ang pagtakod sa HIV sa uban.

Samtang sa dakbayan sa Mandaue,  gibuksan na usab ning semanaha ang HIV-Testing Center sa sulod sa compound sa City Health Office  (CHO)  sa Wellness Center nga nahimutang sa Barangay Centro sa maong dakbayan.

Libre  ang pagpa-testing  ug counseling ngadto sa mga lalaki nga nagbaton og HIV. Sanglit sumala pa ni Jerson See, presidente sa Cebu Plus,  matagad na ang kalalakin-ang nagduda nga duna sila’y HIV sanglit duna may social hygiene sa CHO alang sa mga babaye.

Matud pa ni See nga ang Department of Health (DOH) milakip sa ilang talaan sa Dakbayan sa Mandaue nga usa sa mga dapit dinhi sa nasud nga nagkataas ang gidaghanon sa HIV.

“The rise of HIV cases in these cities is alarming,” matud pa ni Dr. Joselito Bital, ADB consultant sa iyang pamahayag atol sa pagbukas sa maong pasilidad.

Si  City Health Officer Edna Seno  miingon usab nga ang  pag-usbaw sa gidaghanon sa nagbaton og HIV sa dakbayan gibase sa pagtuon sa DOH, apan wala pa nila kini makompirmar diha sa siyudad. (BANAT NEWS)