Lunch break sa mga polis pamub-an

CEBU, Philippines - Plano karon sa Cebu City Police Office (CCPO) nga pamub-an ang lunch break sa mga polis aron dili malutsan sa mga criminal nga naglihok sa dakbayan.

Matud ni CCPO Direktor, Sr. Supt. Noli Romana, nga iyang nabantayan nga kasagaran sa mga tulis nga nahitabo itunong sa oras nga tingpaniudto nga dili dali makaresponde ang kapolisan.

Sumala pa ni Romana nga polis ra gyud ang bantayan sa mga tulisan.

Matud ni Romana nga dili gyud mag-relax ang kapolisan sa ilang trabaho.

Giangkon sa opisyal nga gikinahanglan nila ang tabang sa ubang ahensya ug kumunidad aron mas dali ang pagsumpo sa mga krimen ilabi na sa sunod-sunod nga tulis nga nahitabo sa dakbayan.

Plano ni Romana nga dili na molapas sa ala una sa hapon ang lunch break sa kapolisan.

Si Romana mipagawas sa maong kamanduan human sa sunod-sunod nga tulis sa dakbayan mugna sa grupo ni Leonardo Rama nga hangtud karon padayon pa nga gipangita sa kapolisan. (/GMR)(BANAT NEWS)