Iho, lumod gipintal sa Mandaue
CEBU, Philippines - Makita sa mga koral sa dakbayan sa Mandaue ang gipintal nga hulagway sa mga iho, lumod ug susamang endangered species sa kadagatan.
Ang international mural artist nga si A.G. Saño ang mihimo sa pagpamintal tumong sa pagpahinumdum sa katawhan ilabi na sa kabataan sa pagpanalipod sa mga butang sa kadagatan.
Usa sa mga dakung hulagway makita sa koral sa Saint Joseph Academy sa Centro, dakbayan sa Mandaue.
Gitumong usab ang pagpintal sa mga hulagway aron pagkabig sa pagtagad sa mga Mandauehanon sa pagpreserbar sa kinaiyahan nga makahatag usab og katahum sa palibot.
Matud ni Saño nga naghimo usab siya og susamang kalihukan sa ubang mga dapit sa nasud nga naglakip na sa Manila ug unang higayon nga iyang gihimo sa dakbayan sa Mandaue.
Si Saño mao usab ang nangulo sa pagpintal sa koral nga semento ug flyover sa barangay Subangdaku ug gi-abagan sa pipila ka mga batan-ong molupyo sa maong dapit.
“We do this so they feel ownership for a work of art and become an advocate of environment protection themselves,” matud ni Saño.
Ang pagpatahum sa palibot pinaagi sa pagpintal sa mga koral nga semento sa barangay Centro kabahin sa mga kalihukan sa ika-45 nga Charter Day sa dakbayan sa Mandaue karong Agosto 30. (BANAT NEWS)
- Latest
