Gihimong service
CEBU, Philippines - Nahimong sentro karon sa kontrobersiya ang kanhi hepe sa Theft and Robbery Section (TRS) sa Cebu City Police Office (CCPO) ug karon hepe sa Punta Princesa Police Station, human nga gipasanginlan nga migamit sa sakyanan nga gi-impound sa buhatan sa TRS.
Ang hepe sa Cebu City Police Office, Senior Superintendent Noli Romana mimando na karon sa paghimo og imbestigasyon batok ni Chief Inspector Noli Cernio, hepe sa Punta Princesa Police Station.
Matud pa ni Romana nga usa ka klaro nga kalapasan sa Memorandum Circular nga naggikan sa kaulohang buhatan sa kapulisan nga gidili ang paggamit sa mga sakyanan nga gi-impound sa usa ka buhatan sa kapulisan. Si Chief Inspector Noli Cernio, giimbestigar gumikan sa paggamit sa Mitsubishi Lancer sa dihang siya pay hepe sa TRS.
Ang maong sakyanan narekober sa kapulisan didto sa Apitong corner, Molave Street, Lahug Cebu City, niadtong Oktubre 12, 2013, dihang si Inspector William Alicaba pa ang hepe sa Theft and Robbery Section. Susamang reaksyon sab ang gibuhian nga pamahayag ni Chief Insp. Aileen Recla ang hepe sa Investigation Detection and Management Branch (IDMB) sa CCPO nga mihulagway nga sayop ang gihimo ni Cernio.
Gusto usab sa IDMB nga patubagon si Alicaba, Cernio , Senior Inspector Elisandro Quijano ug ang hepe sa TRS nga si Chief Insp. David Señor .
Sa pakighinabi sa Banat News ni Cernio kini mipasabot nga igo lang siya misunod sa unang gibuhat sa iyang gisundan nga hepe sa TRS nga migamit sa maong sakyanan.
Samtang si Alicaba nga nahinabi sab sa Banat News mitug-an iyahang gigamit kaniadto ang maong sakyanan sa ilang trabaho.
Matud pa niya nga ila nang gi-check ang engine ug chassis number sa maong sakyanan ug ila na sab kini nga gipasubay sa Land Transportation Office apan wala kini record nga nakita. (BANAT NEWS)
- Latest
