Mga tulisan misiaw pag-ayo
CEBU, Philippines - Gipalagot g’yud og maayo sa mga tulisan ang mga polis kay ang gasoline station didto sa Barangay Aliwanay, Balamban gitulis kini sa upat ka armadong tawo kaniadto’ng Martes sa gabii.
Walay kahadlok ang mga tulisan nga mitulis sa FB Gas Station kay gawas nga walay guwardiya nga nagbantay, ang gasolinahan wala ‘say Close Circuit Television (CCTV) camera.
Si PO2 Donard Pitogo sa Balamban Police Station miingon nga ang mga tulisan nagpatuo nga magpatubil og gasolina apan gisulod nila ang cashier ug gitulis, ingon man nagpatubil pa og gasolina sa ilang motor.
Ang cashier nga si Dinesber Borja ug ang mga gasoline boy nga sila si Santiago Rabanes ug Benson Taña, walay nahimo pagsukol sa mga tulisan.
Nakuha sa mga tulisan ang P20 mil ug duha ka cellphones. Matud pa nga kursonada kaayo ang mga tulisan human nga wala g’yud gani nagtaptap sa ilang dagway atol sa pagpanulis.
Ang mga tulisan adunay igo-igo nga gitas-on ug migamit og mga motor nga ang usa natiman-an nila ang plaka.
Matud ni PO2 Pitogo nga nagduda sila nga posible’ng ang grupo na usab ni Leonardo Rama ang naghimo sa mao nga pagpanulis.
Sa laing bahin, gitulis usab sa duha ka lalaki ang branch manager sa M. Lhuillier Pawnshop sa Barangay Luyang, Carmen kaniadto’ng miaging Martes.
Si PO3 Jerome Quimque sa Carmen Police Station miila sa gitulis nga mao si Jocelyn Garbo, 42, nga nakuhaan og touch screen nga cellphone nga nagkantidad og P18,000, salapi ug ubang mga butang. (BANAT NEWS)
- Latest
