Nagpatutoy gidunggab sa kapuyo
CEBU, Philippines- Batan-on nga inahan nga nagpatutoy sa iyang anak gidunggab sa kapuyo human sa ilang panaglalis kaniadto’ng Lunes sa gabii didto sa Sitio Kapaping, Barangay Basak, dakbayan sa Lapu-Lapu.
Matud sa kapolisan nga si Regina Estrada, 19 anyos, temporaryo nga nagpuyo sa maong dapit gidunggab ni Jovencio Santillan, 35, nga nagtrabaho isip drayber sa usa ka tourist van.
Base sa imbestigasyon ni PO3 John Carlo Jocutan sa Lapu-Lapu City Police Office (LCPO) homicide section nga sa wala pa mahitabo ang pagpanunggab nagkalalis ang magtiayon samtang nagpatutoy ang biktima sa iyang lima pa ka buwan nga anak.
Ang iyang kapuyo nga wala na makaagwanta sa ilang panaglalis nikuha og gunting dayon giluba diha-diha dayon si Estrada ug nga naigo kini sa iyang wala nga bahin sa lawas.
Si Santillan dali nga miikyas samtang ang samaran niya nga kapuyo nga si Estrada misumbong sa barangay hall ug nangayo’g tabang. Ang biktima dali nga gihatod sa Vicente Sotto Memorial Medical Center.
Matud ni Jocutan nga selos maoy hinungdan sa away nga miresulta sa pagpanunggab. Ang kapuyo ni Estrada gipangita na sa mga polis aron dakpon ug pasakaan og kaso. - /RUB) (BANAT NEWS)
- Latest
