Pharmacy gitulis
CEBU, Philippines- Gitumbok ang grupo ni Leonardo Rama nga maoy nitulis sa usa ka pharmacy sa Bulacao, dakbayan sa Sugbo ala-una pasado kagahapon sa hapon.
Matud ni Chief Insp. Alexis Relado, hepe sa Pardo Police Station, nga positibong gitudlo sa guwardiya sa 360 Pharmacy nga si Rama ug ang iyang kauban nga si Wendell Mendoza ang misulod sa ilang establesemento ug gani gikuhaan pa sa armas ang guwardiya.
Sumala pa ni Relado nga wala na’y nahimo ang cashier sa maong pharmacy nga si Rubelyn Gabatan human nga giti-onan og armas, dayon deklarar og hold-up sa duha ka suspek.
Ang deputy chief sa City Intelligence Branch (CIB), Insp. Gomersendo Mandawe, mibutyag nga nagpatuo nga kustomer ang mga tulisan ug gi-una og duol ang guwardiya dayon kuha sa service firearm.
Nidemanda pa ang duha ka suspek nga ablihan ang vault apan gumikan kay wala’y vault ang cash nalang sa drawer ang gidala sa mga tulisan.
Dili mo-minos sa P20 mil ang nakuha sa mga tulisan dayon sibat sakay sa usa ka motorsiklo nga gi-parking pipila ka metros ang gikan sa pharmacy.
Ang grupo mao usab ang gitudlo nga mitulis sa LBC remittance center sa dalan Escario sa niaging semana diin nakuhaan og dili mominus P10 mil.
Si Rama kanhi military agent sa kasundaluhan sa Davao Region ug giingong halos tulo na ka tuig nga nia sa Sugbo nga mitukod og robbery group nga konektado sa ubang dagkung grupo sa mga tulisan sa Mindanao. - /GMR) (BANAT NEWS)
- Latest
