Mikunhod ang aksidente sa sakyanan sa Mandaue

CEBU, Philippines - Mikunhod ang  mga nahitabong aksidente nga naglambigit og  mga sakyanan sukad sa pagbutang  sa  modernong traffic lights sa mga dagkong eskina sa mga karsada sa dakbayan sa Mandaue.

Kini ang gibutyag ni SPO4 Apolinario Niez, chief investigator sa traffic division sa Mandaue City Police Office (MCPO) nga nahinabi sa Banat Manobela kagahapon.

Matud ni SPO4 Niez nga kaniadto makatala g’yud unta sila og labing minus 18 ka panagbangga sa sakyanan matag adlaw nga usahay moresulta sa pagkaangol,  pagkakalas sa kinabuhi ug grabeng kadaut sa mga sakyanan apan karon minos na.

Hinuon may mga motorsiklo gihapon nga bisan kun apiki na ang ilang pagtadlas sa eskina kay hapit na ang stop signal mopabulhot lang gihapon sa pagpadagan nga makahatag og kakuyaw sa ubang sakyanan.

Si SPO4 Niez miingon nga ang mga moderno nga traffic lights sa Mandaue nga gigastohan og P40 milyones dako kaayo og gikatabang dili lang sa pagpakunhod sa mahitabong panagbangga sa mga sakyanan.

Ang mga Closed Circuit Television (CCTV) camera  sa mga eskina sa dalan  dako usab og gikatabang sa pagpadali sa resulta sa imbestigasyon nga ilang pagahimuon tungod kay makita na man kun kinsa ang sad-an sa nalambigit nga mga drayber pinaagi sa recorded video footage.

“Kaniadto god sa wala pa ang CCTV camera madugay ang imbestigasyon kay ang drayber nga nalambigit sa aksidente magpalabwanay pa man sa ilang katarungan. Karon dili na man makapangatarungan ang sad-an nga drayber kay makita man sa pag-review sa recorded nga video footage,” matud ni SPO4      Niez.

Sagad g’yud unta mahitabo ang aksidente sa Ouano Avenue sa reclamation Area, ingon man sa United Nations Avenue ug eskina Plaridel dapit sa Marcelo Fernan Bridge.

Si SPO4 Niez miingon nga may mga dalan pa hinuon sa Dakbayan sa Mandaue nga wala pa kabutangi og CCTV camera ug ilang gipanghinaut nga kagahinan ra unya kini og budget nga ikapalit og susama nga kahimanan.  (BANAT NEWS)