Sea mishap sa Lawis Ledge gihandom

CEBU, Philippines - Gihandom kagahapon sa kagamhanan sa siyudad sa Talisay ang unang death anniversary sa mga biktima sa nalunod nga barkong M/V St. Thomas Aquinas sa Lawis Ledge sa dakbayan sa Talisay human gikabangga ang M/V Sulpicio Express Siete.

Si Konsehal Danny Caballero kinsa maoy nangulo sa kalihokan mibutyag nga atol sa pagkalunod sa barko niadtong Agosto 16 sa miaging tuig usa siya sa nakakita sa nagpasad nga mga patay'ng lawas nga naugkat sa mga rescuers.

Gidugang ni Caballero nga bisan og dili taga Talisay ang mga nabiktima apan iyaha kining gihatagan og pagtagad ug gani mapasalamaton ang konsehal ngadto sa mga mananagat nga mitabang g’yud pagluwas sa mga biktima.

Alang usab sa konsehal nga lab-as pa kaayo sa iyang panumdoman ang nahitabo ug misimpatiya kini sa mga nabiyaang pamilya sa mga biktima ug niadtong kapin baynte ka pasahero nga hangtod karon missing pa gihapon.

Si Mark Cabanes, usa ka mananagat ug lakip sa mitabang sa mga biktima miasoy nga bisan og usa ka tuig na ang nakalabay apan kun moagi siya sa Lawis Ledge mobalik gihapon sa iyang huna-huna ang nahitabo.

Gani iyang giangkon nga manimbawot ilang balahibo ini og moagi sa dapit diin nalunod ang M/V St. Thomas Aquinas.

Sa wala pa ang paghalad og buwak sa dagat, usa ka Santos nga Misa ang giselebrar ni Father Patrick Medina sa Society of the Angel of Peace ug nagdagkot og mga kandila diha sa  Talisay Fish Port diin didto gipangdala ang mga patay'ng lawas nga naugkat gikan sa dagat. (BANAT NEWS)