Gambling machines gironda

CEBU, Philippines -  Walo ka mga illegal gambling machines ang nasakmit sa kapolisan sa sudlonon nga bahin sa barangay Duljo- Fatima, Cebu City, pasado alas 12 sa miaging kaadlawon.

Nakadawat og impormasyon ang City Intelligence Branch (CIB) sa Cebu City Police Office (CCPO)  labot  sa pagbalik og operate sa mga video karera sa maong lugar.

Matud pa ni Police Inspector Gomersendo Mandawe ang deputy chief sa CIB nga nahinabi sa Banat News mitug-an nga taud-taod na ‘sab nga nawala ang video karera sa maong lugar, apan duna’y naghatag nila og impormasyon nga kini gibutang sa interior nga bahin sa maong barangay.

Sa miaging kaadlawon gisulod sa mga operatiba ang Sitio Riverside  diin gibutang ang mga video karera nga gibutang sa extension sa usa ka balay.

Walay tawong nasikop ang mga operatiba human nga nanagan ang mga sugarol. Gawas sa Duljo Fatima, duna pay laing nadawat nga impormasyon ang kapolisan bahin sa operasyon sa illegal gambling machines sa uban pang barangay. (/EIM)(BANAT NEWS)