Abangan sa stalls patas-an

CEBU, Philippines - Hayan daghan ang moundang sa pagpaninda kung ipatuman ang usbaw nga abangan sa stalls sa lain-laing mga merkado sa dakbayan sa Sugbo.

Kini gumikan kay daghan ang giingong dili maka-afford sa bayranan nga mosaka gikan sa P5   matag metro kwadrado ngadto na sa P30 nga gihulagway sa mga manindahay nga sobra ra kaayo ka taas.

Apan si Market Administrator Raquel Arce miingon nga mahinungdanon kini tungod kay ang tanang mosulod nga income sa merkado pinaagi sa buhis nga gipangbayad sa mga manindahay mobalik ra gihapon sa merkado pinaagi sa pagpanindot sa mga pasilidad ug ubang basic services.

Daghan ang dili uyon sa pagpataas sa abang tungod kay para sa mga manindahay taas ra kaayo. Ang abogado sa grupo sa mga manindahay sa Pasil Fish Port, Atty Julius Entise, miingon nga kung may 10 metros kwadrado nga giabangan ang usa ka tindera, makabayad siya og P300 kada adlaw.

Sumala sa mga manindahay nga dako ra kaayo ug maglisud sila og kab-ot tungod kay nihinay na ang dagan sa paninda.

Hangyo usab ni Entise nga unta magpabilin nga kada banyera ang bayad sa buhis ug dili kada kilo tungod kay mas mahal na hinoon kini.

Samtang giklaro ni Arce nga gibase nila ang dugang nga abang depende sa merkado diin sila naninda. 

Sa pagkakaron, padayon pa ang pagtoon sa konseho kalabot sa maong hangyo sa market administration nga usbaw sa abang. (BANAT NEWS)