Pagtago sa lana gisusi
CEBU, Philippines - Gisusi na sa Department of Energy-7 kun may hoarding o pagpanago sa supply sa petroleum products sa Sugbo.
Kini human nireklamo ang ubay-ubay nga mga motorista nga gibalibaran sa pipila ka mga gas stations tungod kay wala na’y supply sa krudo ug gasolina.
Si Engr. Saul Gonzales, hepe sa Energy Intercede Division sa DOE-7 mitataw nga wala sila’y nadawat nga report nga may shortage sa petroleum products sa Central Visayas ilabina sa Cebu.
Iyang giklaro nga base sa lagda sa DOE, ang ilang buhatan hatagan dayon og report sa mga oil companies kun may kakulangan sa supply sa petroleum products.
Matud niya nga ang ilang buhatan mopahigayon dayun og pakisusi kun may kamatuoran ba pagkuwang sa supply sa krudo ug gasolina sa mga gas stations ug unsa usab ang hinungdan niini.
Apilon sa ilang pakisusi kun may hoarding ba sa supply sa petroleum products tungod kay wala man sila’y nadawat nga report nga may kakulangan sa supply sa lana sa Sugbo. (BANAT NEWS)
- Latest
