Tig-anak nga dolphin nadagsa patay sa Toledo

CEBU, Philippines - Napalgang patay ang usa ka dolphin  nga gituohang nanganak sa baybayon sa sityo Canjuntic, Matab-ang, dakbayan sa Toledo alas 6:30 kagahapon sa buntag.

Usa ka Elvie Oman, caretaker sa usa ka establesamento nga duol sa dagat ang nakamatikod nga adunay nadagsa hinungdan nga iyang giduol ug nasuta nga usa ka dolphin.

Daling mi-report si Oman sa mga opisyal ug miabot ang mga sakop sa Bantay Dagat nga sila si Leo Cantabacco, Henry Rabago ug Arturo Araba aron pagbantay sa dolphin.

Matud ni Lutherian Hernando sa Department of Environment and Natural Resources-Toledo nga  ang maong dolphin  gibana-banang anaa sa 1.3 metros ang gitas-on ug gilapdon sa lawas nga 40 sentimetros ug gibana-bana nga anaa sa 40 kilos ang gibug-aton.

Nakita usab nga hapit na’ng mogawas ang anak sa dolphin nga gibana-bana ang gitas-on nga anaa sa 60 sentimetros.

Gituohan nga anaa na sa lima ka adlaw nga namatay sa lawod ang maong dolphin tungod kay nadugta na, napaslot na ang panit ug nangalisbo na sa kabaho una nadagsa sa baybay.

Wala’y nakitang laing samad sa lawas sa maong dolphin gawas sa agianan sa pag-panganak diin nag-ung-ong ang anak. Gimando sa mga awtoridad ang pagpalubong na lang sa maong dolphin tungod sa pangalisbo sa kabaho nga posibleng makahatag og sakit sa mga residente. (BANAT NEWS)