Mabolo gironda

CEBU, Philippines - Human sa nadawat nga impormasyon sa kapulisan sa dakbayan sa Sugbo may kalabutan sa mga ilegal nga kalihokan nga naglihok sa Block 27, Sitio San Isidro, Mabolo, Cebu City, milusad og saturation drive nga gitawag nila og “Intensified Police Operation” (IPO) ang City Intelligence Branch (CIB), Motorcycle Riding Unit (MRU), Special Weapons and Tactics (SWAT) ug Mabolo Police Station, aron masumpo ang mga naglihok nga ilegal sa maong lugar.

Ang operasyon gipangulohan sa hepe sa kapulisan sa dakbayan sa Sugbo, Senior Superintendent Noli Romana  nga miresulta sa pagkasakmit sa mga pinaketeng shabu ug daghang marijuana.

Alas 9:30 sa nakalabay nga gabii  gisulod sa kapulisan ang maong lugar ug ilang nasakmit gikan sa mga payag payag ang walo ka paketeng shabu, 23 ka linikit nga marijuana ug 25 ka gramos nga pinauga nga dahon sa marijuana nga gisulod sa plastic canister.

Sumala pa ni Romana nga nahinabi sa Banat News nga walay bisan kinsa nga miangkon sa maong mga drugas maong way nadakpan ang kapulisan.

Matud pa ni Romana nga duna sila’y daghang  nadawat nga impormasyon nga duna’y mga snatchers ug tulisan nga diha modagan human makabiktima.

Gipasabot ni Romana nga ang ilang gibuhat mao lang ang pagpakgang sa unsa man nga plano sa mga tawo nga nagpuyo sa maong lugar. (BANAT NEWS)