DENR nangandam sa El Niño

CEBU, Philippines-Nangandam na ang Department of Environment and Natural Resources aron dili maapektuhan ang kapin 40 mil ektarya nga plantasyon sa Rehiyon-7.

Kini human gipahibawo sa Philippine Atmospheric Geophysical and Astronomical  Services Administration (PAGASA) nga posibleng sunod buwan na masinati ang grabeng kainit dala sa El Niño phenomenon.

Ang tigpamaba sa DENR-7, Eddie Llamedo, mibutyag ila karong gibansay-bansay ang mga forest rangers aron maoy motubag kun dunay mga forest o bush fires nga motumaw.

Duna usab sila’y mga ekipo nga gipangapod-apod sa mga plantasyon ug gimando ang 24 oras matag adlaw nga pagbantay.

Giangkon ni Llamedo nga duna sila’y gamay'ng problema tungod kay ang target nila nga plantasyon karong tuiga miabot sa 17 mil ektarya apan   gihunungan una sa pagpananum tungod kay apektado man sa El Niño.

Hinuon gipasalig sa DENR nga ang mga una na nila’ng natanum gihatagan gyud nila og pagtagad  aron dili maapektuhan. - /GMR) (BANAT NEWS)