Naglakaw gidunggab sa liog
CEBU, Philippines - Nakaangkon og samad sa liog ang usa ka lalaki nga gidunggab og kutsilyo samtang naglakaw sa may karaang merkado sa Centro, dakbayan sa Mandaue kagahapon sa kadlawon.
Ang biktima mao si Gilans Ocampo, 20-anyos, taga Marfa, Maguikay sa maong dakbayan ug ang suspetsado giila nga si Martin Mancao alyas Langging, 20-anyos, taga Tubod, Minglanila.
Si PO2 Jesson Flores miingon nga naglakaw lang ang biktima ug sa wala’y igong hinungdan kalit lang gidunggab sa suspetsado ang liog hinungdan sa pagka-samad. Matud ni Flores nga usa ka minor de edad nga lalaki ang nakakita ug positibong miila sa suspetsado kinsa daling nakasibat.
Daling gihatud ang biktima sa Mandaue City Hospital apan gibalhin sa Vicente Sotto Memorial Medical Center sa dakbayan sa Sugbo.
Ang team nilang PO1 Charlie Avila, PO1 Mike Danlasan ug PO1 Enric Coso mihimo og follow-up operation ug ilang nadakpan ang suspetsado gipuy-an niini sa sitio Bas, Canduman sa maong dakbayan.
Nakuha gikan sa dinakpan ang 13-pulgada nga gitas-on sa kutsilyo nga maoy gigamit sa pagdunggab sa biktima. (BANAT NEWS)
- Latest
