‘Pusher’ sa naga nadakpan
CEBU, Philippines - Gisikop sa kapulisan sa siyudad sa Naga ang usa ka gipasanginlang notadong drug pusher, didto sa Barangay Langtad, Naga City, pasado alas-8 kagahapon sa buntag, diin ubay ubay nga drugas ang nasakmit sa mga operatiba.
Armado sa search warrant ang kapulisan nga miadto sa panimalay ni Wendell Genodiala, 38, human sa taod- taod nga gihimong pag-monitor kaniya.
Sumala pa ni PO1 Raymund Romarez sa Naga Police Station nga nahinabi sa Banat News usa si Genodiala sa mga notado nga tigpayuhot og ilegal nga drugas sa Naga ug daghan na ‘sab ang mipaabot og impormasyon sa ilang buhatan bahin sa iyang ilegal nga kalihokan.
Usa ka search warrant ang giisyu ni Judge Wilfredo Navarro sa Regional Trial Court (RTC) Branch 19 batok sa suspek.
Nakuha sa kapulisan gikan sa panimalay sa suspetsado ang 11 ka gagmay nga pakete ug tulo ka medium size packs nga gituohang shabu ug drug paraphernalia.
Gawas sa target sa kapulisan apil ‘sab nga ilang gisikop ang laing duha ka lalaki nga diha sulod sa balay ni Genodiala nga naila nga sila si Melvin Villafuerte, 23, kinsa nakuhaan og usa ka paketeng shabu ug Alexander Donaire Jr.,23, nakuhaan ‘sab og usa ka pekete sa drugas, ang duha pulos taga Pitalo, San Fernando. (BANAT NEWS)
- Latest
