Drug den sa Cordova gironda sa NBI

CEBU, Philippines - Gironda sa mga sakop sa National Bureau of Investigation (NBI) 7 ang usa ka panimalay sa Sitio Calan, Barangay Poblacion, Lungsod sa Cordova niadtong Biyernes sa hapon nga miresulta usab sa pagkasikop sa 21 ka tawo apil tulo ka menor de edad.

Si SPO1 Llovero Agosto sa Cordova Police Station miingon nga ang NBI- 7 nga gipangulohan ni Special Investigator Teddy Saavedra mi-coordinate kini sa ilang buhatan sa operasyon nga ilang pagahimuon sa nahisgutang lungsod.

Ang team ni Saavedra mironda sa panimalay ni Edot Degamo  pinasikad usab sa warrant of arrest nga giluwatan ni Judge Soliver Peras sa Branch 10 sa Regional Trial Court.

Sumala pa ni Agosto, nasakmit atol sa maong pagpangronda ang usa ka gamay’ng paketeng shabu, drug paraphernalia, tin  foil lighter ug mga armas nga naglakip sa kalibre .45 nga pistola,  kalibre .38, .357 rebolber ug usa ka improvised shotgun.

Gitug-an ni  Saavedra ngadto sa mga tigbalita nga ilang gipaubos si Degamo sa kapin sa usa ka bulan nga surveillance dihang nakadawat sila og mga kasayuran labot sa ilegal nga kalihokan sa maong lugar. Gawas ni Degamo nadakpan usab sa panimalay niini sila si  Angelito Holgado, 53, Joel Degamo, 37, Allan Pacaldo, 34, Eufil Hidalgo, 31, Brandon Cuaton, 34,  Rowel Jabonillo, 28, Albert Alcordo, 39, Eulalio Escabas, 52, Remark Dangua, 18, Elzar Maravillas, 18, Jonathan Nuñez, 23,  Mark  Dangua, 20, Sergio Maravillas, 48, Jay Apatan, 34, Marlon  Mahusay, 32, Felixberto Matidios, 44,Gilbert Sitoy, 30 ug Kristine Fuentespina, 30.

Dugang nadakpan sa mga sakop sa NBI sa maong pagpangronda mao usab ang tulo ka minor de edad nga naaktohan usab nga didto sa sulod sa panimalay ni Degamo.

Ang mga dinakpan nga temporaryo karong gitanggong sa detention cell sa NBI 7  gikatakdang pasakaan og kaso nga kalapasan sa Republic Act 9165 o Comprehensive Dangerous Drug Act of 2002. (BANAT NEWS)