Marijuana gipangibot
CEBU, Philippines - Kapin sa 200 ka puno-an sa marijuana ang gipangibot sa kapolisan sa dakbayan sa Toledo sa bukirang bahin sa sityo Gingkamote, barangay Capt. Claudio, kagahapon sa buntag.
Ang operasyon gipangulohan ni Chief Insp. Michael Anthony Bastes, hepe sa Toledo City Police Station, kauban ang Regional Public Safety Battalion (RPSB) ug mga barangay tanod sa maong lugar.
Dul-an tulo ka oras ang pagbaktas sa mga awtoridad paingon sa maong dapit.
Matud ni Bastes nga moabot sa 245 ka mga stalks sa marijuana ang ilang gipanglarot sa usa ka tanaman sa maong lugar samtang dili pa matino ang kinatibuk-ang kantidad niini.
Nakita ang tulo ka lote nga gitamnan sa marijuana diin ang duha posibleng gi-harvest na.
Dugang ni Bastes nga dugay na nilang gipanid-an ang maong tanaman sa marijuana human nakadawat og report gikan sa mga residente nunot sa gihimong drug symposium.
Tungod niini gihingusgan karon ang pagsumpo sa marijuana sa siyudad ingon man sa ginadiling drugas nga shabu. (BANAT NEWS)
- Latest
