Idlas nga ‘pusher’ nasikop sa ronda
CEBU, Philippines - Nasikop sa kapolisan ang usa ka lalaki nga giingong idlas nga tigpayuhot og ginadiling drugas human sa pagronda sa mga sakop sa Mabolo Police sa Sindulan Street, Barangay Mabolo sa dakbayan sa Sugbo sa miaging gabii.
Ang nasikop naila nga si Harold Joseph Bacaltos, 39, molupyo sa nahisgotan nga lugar.
Matud pa ni PO2 Franklin Bulaquia, desk officer, nga nahinabi sa Banat News nga ang maong operasyon gipangunahan mismo ni Senior Inspector Hartzel Peter Bellido human nakakuha sila og search warrant nga giluwatan ni Executive Judge Soliver Peras.
Apan sa wala pa gi-serve sa kapolisan ang maong search warrant gipaagi pa una og buy- bust ang suspetsado ug human nga napalitan kini og shabu dali kining gisikop.
Narekober sa kapolisan ang dugang napulo ka gagmay nga pakete nga shabu, drug paraphernalia ug ang P610 nga marked money. (BANAT NEWS)
- Latest
