Nagkuwang og nurse

CEBU, Philippines - Gipahibawo sa pangulo sa Bureau of Quarantine sa Central Visayas nga si Dr. Terrence Bermejo nga nanginahanglan karon sila og dugang nurses.

Kini aron motabang sa higpit nga pag-monitor sa mga pasahero ug crew sa mga international flights nga motugpa sa Mactan Cebu International Airport (MCIAA) ug ubang tugpahan sa Central Visayas gikan sa Africa subay sa ilang gipatuman nga heightened alert tungod sa Ebola virus outbreak.

Matud pa niini nga ilang hugtan ang pag-monitor sa mga pasahero ug crews kun wala pa kini magdala sa gikahadlokan nga virus gamit ang thermal scanner pagsuta sa body temperature sa mga pasahero gikan sa gawas.

Ila usab nga hatagan og mga checklist ang tanang mga pasahero nga kompleto sa tanang  impormasyon bahin kanila ilabi na sa address ug telepono aron sayon na lamang niini ang pag-trace kanila kun may pasahero nga may sintomas sa virus.

Samtang si Department of Environment and Natural Resources (DENR-7) Regional Executive Director Isabelo Montejo nipahibawo nga ila usab nga gialerto ang tanang mga wildlife monitoring units sa tanang mga pantalan ug tugpahanan sa upat ka mga probinsiya sa Central Visayas.

Kini aron walay makasulod sa Central Visayas nga mga hayop sama sa chimpanzees, gorillas, fruit bats, primates, forest antelope ug porcupines gikan sa mga nasud nga gihugpaan sa Ebola virus sama sa nasud sa Guinea, Sierra Leone ug Liberia sa West Africa.

Nasuta base sa unang mga pagtuon, ang maong virus naggikan sa maong mga mananap nga mitakod sa tawo.  (BANAT NEWS)