Nasunogan palma nanghinaot makabalik

CEBU, Philippines - Kapin sa 300 ka pamilya ang naapektuhan sa sunog nga miigo sa kapin 100 ka panimalay sa Palma Street, Barangay San Roque, Dakbayan sa Sugbo niadtong Biyernes.

Pagkaon, tubig ug lugar kasilungan ang gikinahanglan karon sa mga biktima nga nasapar-saparan sa siyudad sugod pa niadtong gabii sa Biyernes.

Tungod sa kadaghan sa mga naapektahan, gibahin ang mga nasunogan, dunay gibutang sa San Roque Sports Complex samtang ang uban ‘sab naa sa Tinago Sports Complex.

Mga pagkaong pinutos ug bottled water ang gipanghatag ngadto sa mga biktima sa matag evacuation area. Dunay 288 ka pamilya ang naa sa San Roque samtang 74 ang naa sa Tinago.

Ang Department of Social Welfare and Services kuyog ang Cebu City Risk Reduction Management Council nanghatag og mga pagkaon ug tubig.

Kabahin sa panginahanglan sa pansayan, adunay duha sa San Roque ug upat sa Tinago nga mga ‘portalets’ nga gipagamit sa siyudad.

Ang ubang pamilya namroblema sa kainit sa evacuation area ilabi na kadtong adunay mga gagmay’ng bata ug mga tigulang nga miyembro.

Matud pa sa usa ka 18-anyos nga inahan sa duha pa ka buwan masuso, nga si Trixie Ornopia, lisod ang ilang kahimtang ilabi na kay wala kaayo’y nasalbar sa ilang mga gamit.

Samtang, si Jose Pitogo, 62, dili mopahawa sa ilang lugar sa Palma kay iyang bantayan ang mga scraps sa ilang balay kay nabalaka siyang pangawaton.

Ang mga biktima nanghinaot makabalik pa sila pagtukod og balay sa yutang nasunugan nga gipanag-iya sa gobyerno.

Si Bise Mayor Edgardo Labella daan nang namahayag nga subay sa polisiya ni Mayor Michael Rama, walay biktima sa sunog nga kinahanglang ma-displaced. Mokabat og kapin usa ka libo ka indibidwal ang naapektuhan sa maong sunog. Hangtud karon, ang arson investigators padayon pa sa pag-imbestigar sa hinungdan sa sunog.  (BANAT NEWS)