200 ka c.a. sa Talisay gihimakak

CEBU, Philippines -  Gihimakak ni Talisay City Administrator John Yre De los Reyes nga adunay 200 ka confidential assistants ang administrasyon sa iyang amahan nga si Mayor Johnny De los Reyes.

Niadtong Martes, si City Accountant Viluzminda Villarante gipatawag sa konseho sa siyudad ug gipatubag sa mga pangutana kabahin sa pagkaltas og buhis sa sweldo sa mga job order (JO). Didto gibutyag ni Villarante nga ang siyudad adunay 1,700 ka JO lakip na niini ang confidential assistants nga 200 kabuok.

Si John Yre nga nahinabi sa Banat News nagkanayon nga iyang nasayran sa Human Resource Management Office niining buwana nga ang siyudad adunay 1,400 ka JO. Ang buhatan sa mayor ug bise mayor aduna la’y 20 ka confidential assistants. Nagtoo si John Yre nga posibleng giapil sa ihap ni Villarante ang mga mangihaway sa ihawan sa siyudad tungod kay wala kini malakip sa kota.

Ang mga mangihaway nagtrabaho sukad pa niadtong milabay nga administrasyon.

Matud ni De los Reyes nga ang maong mga mangihaway dili pwedeng ilis-ilisan tungod kay mga “well-trained butchers” sila ug dili sila gustong maapektohan ang operasyon sa ihawan.

Subay niini, gibutyag ni De los Reyes nga ang mga kapitan sa barangay dili pareho og kota diin adunay gihatagan og lima ug adunay tulo o usa depende sa panginahanglan sa ilang barangay. (/GMR)(BANAT NEWS)