Bata namatay sa sumbag sa kaduwa

CEBU, Philippines -  Patay na nga naabot sa Cebu City Medical Center ang 13-anyos nga batang lalaki human kini natumba ug nawad-an sa iyang panimuot dihang naigo sa kumo sa 14-anyos nga iyang gikasukmagay.

Ang insidente nahitabo niadtong Huwebes sa hapon sa atubangan nga bahin sa usa ka inilang unibersidad sa Barangay Mambaling siyudad sa Sugbo.

Base sa imbestigasyon sa Homicide Section sa Cebu City Police Office dugay nadala ang 13-anyos sa tambalanan human kini matumba ug giingong gihapit pa kini sa Mambaling Police Station ug ang mga pulis na ang midala sa bata sa ospital apan gideklarar kini nga dead on arrival.

Si PO3 Leroy Baguio sa Homicide Section miasoy nga nagduwa-duwa og sukmagay ang duha ka bata apan naigo ang kuto-kuto niini hinungdan nga naundang ang ilang duwa apan paglabay sa pipila ka gutlo natumba kini ug nawad-an sa iyang panimuot.

Sa iyang bahin, ang 14-anyos nga kaduwa niini miingon nga niya damha nga namatay ang iyang amigo kay duwa-duwa ra ang ilang sinumbagay.  Girekomendar nga ipa-awtopsiya ang lawas sa namatay aron sutaon ang hinungdan sa kamatayon niini.(/EIM)(BANAT NEWS)