2,000 Nadakpan sa Team sa Hunyo
CEBU, Philippines - Kapin sa 2,000 na nadakpan sa mga traffic enforcer sa Traffic Enforcement Agency of Mandaue (TEAM) sulod lang sa buwan sa Hunyo.
Kini base sa na-isyu nga citation ticket sa mga traffic enforcers sa nagkalain-laing kalapasan sa lagda sa trapiko.
Ang gipamutang nga modernong traffic lights nga may closed-circuit television (CCTV) cameras, timers ug sensors ang gitumbok nga nakatabang sa pag-monitor sa mga malapasong drayber.
Naglangkub sa mga sakyanan nga nadakpan mao ang mga public utility jeepney, traysikol ug mga taxi.
Nadakpan ang walo ka drayber sa traysikol tungod sa illegal parking ug ang pipila kanila nagbiyahe nga wala’y prangkisa.
Dugang nadakpan ang 205 ka drayber sa PUJ sa obstruction, 37 sa “No Entry” ug 1,421 sa ubang kalapasan.
Si Edwin Ermac, operation chief sa TEAM, miingon nga kadtong mga drayber nga nag-amping sa ilang pagmaneho sa sakyanan ug nagtuman sa lagda sa trapiko dili gyud madakpan sa mga traffic enforcers diha sa kadalanan. (BANAT NEWS)
- Latest
