Gireklamong nurses nabalik na sa trabaho

CEBU, Philippines- Nakabalik na sa ilang trabaho ang duha ka nurse sa Cebu Puericulture and Maternity House Inc. nga unang gilambigit sa pagplaster sa baba sa usa ka masuso nga si Baby Yohannes sa sud sa ilang nursery room.

Giingong wala nay tulubagon ang duha ka nurse nga sila si Arianne Mae Pacula ug Kamille Isabel Neri human matud pa nakig-settle ang inahan sa bata nga si Jasmine Badocdoc ngadto sa kadagkuan sa Maternity Hospital. Una niini, ang duha ka mga nurse unang gipaubos sa indefinite leave human malambigit sa maong kontrobersiya. Daan na nga mihimakak sila si Neri ug Pacula nga sila ang nagbutang og plaster sa baba sa bata.

Gani si Pacula miingon nga nakurat kini dihang iyang nakita nga ang baba sa bata dunay plaster ug usa ka pacifier ang nakita niini duol sa bata samtang si Neri miingon nga wala siya’y nakita nga tape sa baba ni Baby Yohannes.

Kahinumduman nga mitumaw ang maong report dihang nag-viral sa mga social networking sites ang hulagway sa masuso nga dunay plaster ang baba hinungdan nga dunay mga ahensya sa gobiyerno ang nanginlabot.

Tungod niini, ang Presidente sa Cebu Nurses Association Edith Rose Santos mibutyag nga malaumon siya nga mahimong leksyon alang sa tanan ang maong kaso. - /EIM) (BANAT NEWS)