Mga kauban ni Dumpit naguol

CEBU, Philippines- Aminado ang hepe sa Regional Intelligence Branch (RIB) nga demoralisado sila human sa pagkombikto ni SPO1 Adonis Dumpit kaga-hapong adlawa.

Matud pa ni Superintendent Pablo Labra II nga maoy kanhi hepe sa gibungkag na nga Criminal Investigation and Intelligence Bureau (CIIB) sa Cebu City Police  Office miingon nga lisod kaayo paminawon nga nakombikto ang usa ka polis gumikan lang sa paghimo sa iyang trabaho.

Sumala pa ni Labra nga mahimo kini nga basehan sa uban pa’ng mga operatiba nga mahadlok nalang hinuon nga moresponde og duna’y panghitabo nga motumaw sa ilang mga dapit.

“Kabalo ko nga legitimate ang iyang gibuhat, para nako ma-demoralized atong mga sakop ana.  Igo ra g’yud ‘to siya mitubag sa alarma,” matud pa ni Labra kinsa usa sa miresponde sa maong alarma sa tulis.

Hinuon gibutyag ni Labra nga ilang tahuron ang desisyon sa maong kaso ug motabang sila sa pagtabang ilabi na sa pag-apelar sa Court of Appeals (CA) alang sa maong desisyon. Si Dumpit naila na nga dili magdiki-diki pagresponde panahon nga dunay alarma.

Samtang ang hepe sa kapulisan sa Police Regional Office 7, Chief Superintendent Prudencio Tom Bañas mipadayag nga ilang tabangan si Dumpit.

Matod pa ni Bañas nga kabahin sa trabaho isip usa ka polis nga makasugat og susamang problema, ilabina sa pagtubag sa ilang trabaho.

Sumala pa ni Bañas nga dili pa final ang maong hukom kay mahimo pa silang moapelar sa maong kaso aron masalbar kini. - /EIM) (BANAT NEWS)