Dumpit nakombikto

CEBU, Philippines- Gihukmang mabilanggo gikan sa unom ngadto sa siyam ka tuig ang kontrobersyal nga polis nga si SPO1 Adonis Dumpit human makombikto sa kasong homicide human gi-downgrade ang kasong murder kagahapon.

Si Dumpit gipasakaan og kasong murder tungod sa kamatayon ni Ronron Go, 17-anyos nga taga Villagonzallo II, Barangay Tejero, Cebu City, niadtong 2004. Si Regional Trial Court Judge Ester Veloso sa Branch 6 mi-downgrade sa kaso ni Dumpit human masuta nga wala’y treachery sa pagpusil ni Dumpit ngadto sa biktima tungod kay mi- warning shot pa si Dumpit una niya gipusil si Go.

“The prosecution eyewitness Andres Satorre and the accused Adonis Dumpit both similarly testified that when the victim Go and the accused Dumpit came face to face with each other, the former attempted to flee, despite the warning (shot) of the accused for him not to run away. Hence, it cannot be said that the assault was sudden and unexpected,” ang desisyon nagkanayon.

Matud ni Veloso, nga  bisan ang kampo sa akusado nangangkon nga ang pagpusil ngadto sa biktima ug sa kauban “self defense” lamang human sila maoy giunhan sa grupo sa biktima, apan way ebidensya nga makasuporta niini nga dunay nahitabong shoot-out.

Si Veloso nagkanayon nga wala’y slugs nga na- recover sa crime scene to support nga dunay shoot-out nahitabo niadtong Disyembre 14, 2004 sa alas-5 sa hapon diha sa Sitio Sampaguita, Villagonzalo II, Barangay Tejero. Si Dumpit gisentensyahan nga mapriso sud sa unom ngadto sa siyam ka tuig og upat ka buwan ug gimandoang pagbayad sa nabiyaang pamilya ni Go og P50,000.  Kahinumduman nga niadtong higayuna ang pamilya ni Kimberley Corro, nangayo og tabang ni Dumpit human sila gitulis sud sa public utility jeepney.

Matud niya nga na identify niya si Ronron Go nga maoy mition kaniya og armas sa iyang agtang kay nagdumili siya paghatag sa iyang bracelet.

Matud ni Corro ug sa iyang inahan nga gawas kang Dumpit, nagpatabang usab sila sa Waterfront Police Station.

Nagkanayon usab si Corro nga kun buhi pa si Go sa pag-adto niya sa hospital diin kini gidala manimawos siya niini.

Si Janeth Badana, inahan sa biktima miingon nga ilang dawaton ang desisyon sa korte bisan gi-downgrade kini, human mabasa ang desisyon nga wala gani maabti og 10-minutos migawas dayon si Badana uban sa iyang abogado.

Si Atty. Benjamin Militar, nagkanayon nga mo-file sila’g motion for reconsideration sa desisyon sa korte. Bisan gihangop nila ang pagdawat sa korte sa mga ebidensya, dunay mga punto nga wala hatagi ug gibug-aton ang hukmanan nga maoy gusto nilang hatagan og konsiderasyon. Si Dumpit kinsa nagsul-ob og yellow t-shirt og nakalugay ra ang iyang taas nga buhok nagkanayon nga “it’s a process ang pag-appeal.” - /EIM) (BANAT NEWS)