Barko gikan sa CDO naaberya

CEBU, Philippines- Usa ka barko nga nagdala og 118 ka mga pasahero gikan sa Cagayan de Oro City padung dinhi sa dakbayan sa Mandaue napagngan og makina sa kadagatan sa Balicasag, Bohol kagahapon sa kaadlawon.

Ang M/V Super Shuttle 3 nga giluwanan sa 118 ka pasahero ug 60 ka mga crew gikan sa Cagayan   napagngan og makina alas-2 pasado ang takna kagahapon sa kaadlawon.

Hinuon luwas nga nakaabot sa pantalan sa dakbayan sa Mandaue ang maong barko alas- 3 na pasado ang takna kagahapon sa hapon.

Si Cebu Coast Guard District Commander William Melad miingon nga dali nga nakapahibalo ang kapitan ngadto sa ilang buhatan kalabot sa engine trouble sa maong barko. Usa ka rescue vessel ang gipadala sa coast guard  diha sa kadagatan sa Balicasag, Bohol  aron pagsiguro sa kaluwasan sa mga pasahero.

Matud pa ni Melad nga ang mga engineers ug crew nagtinabangay sa pag-repair sa ilang makina hangtud nga kini mibalik og andar ug nakapadayon sa paglawig padung sa Mandaue City.

Aron pagsiguro nga luwas kining makaabot sa destinasyon, giabayan kini sa rescue vessel sa coast guard hangtud sa Manduae City.

Gimandoan ni Melad ang kapitan sa maong barko pagsumitir og marine protest sa ilang buhatan aron kasugdan ang imbestigasyon sa maong hitabo. - /EIM) (BANAT NEWS)