Overnight parking misiaw na ‘sab

CEBU, Philippines - Mga tag-iya og sakyanan nga pasaheroan wala na karon mahadlok nga moparking sa ilang mga units daplin sa karsada kay nakabantay sila nga milugak ang CITOM sa paghimo’g kampanya sa overnight parking. Dunay mga operators ug mga passenger jeepneys nga kaniadto mihunong na paggamit sa karsada isip ilang parking area sa gabii hangtod na sa kaadlawon nga karon mibalik na ‘sab.

Kaniadto ang ubang operators miabang og luna nga ilang kaparkingan sa sakyanan apan nabantayan karon nga namalik na usab sila sa karsada.

Usa ka drayber og mga jeep pasaheroan sa Barangay Busay mitug-an sa Banat Manobela nga ang ilang operators wala na mag-abang og luna kay nakabantay nga milugak ang CITOM sa paghimo’g kampanya.

Dunay usa ka drayber nga nangomedya pa nga ang CITOM wala na kaayo mohimo’g kampanya kay hapit na ang Pasko. Ilang gitug-anan ang Banat Manobela nga kada Pasko g’yud diay ang ilang operators bisitahan og mga sakop sa CITOM nga mangayo’g pinaskohan.

Gani, bisan ang ubang mga tag-iya og pribado nga sakyanan nga na-clamp na kaniadto sa CITOM clamping team wala na usab mahadlok nga mibalik sa pag-park sa karsada.

Usa niini mao ang Red Picanto nga kanunay nga anha iparada unahan og gamay sa “gate” sa PC Hills PNCO apartment panahon sa gabii nga unta daku kaayo ang traffic sign nga “No Parking Anytime” sa mao nga lugar.

Ang mao nga sakyanan na-clamp na kaniadto apan ang tag-iya wala na mahadlok kay nakabantay nga ang CITOM milugak sa paghimo’g kampanya.

Sa uban nga lugar sa dakbayan sa Sugbo susama ra ang sitwasyon nga mga sakyanan anha ra sa karsada pabuntagan sa ilang mga tag-iya ug apil niini ang mga public utility vehicles.  (BANAT NEWS)