Engkwentro sa Army ug NPA, duha patay
CEBU, Philippines - Patay ang usa ka sundalo ug angol ang usa ka opisyal samtang usa ‘sab ka sakop sa New People’s Army (NPA) ang patay sa duha ka bulag nga engkwenrto sa Escalante ug Capiz Negros Oriental sa nakalabay nga adlaw.
Sa Capiz Negros Oriental, naengkwentro sa mga sakop sa 61st Infantry Battalion sa Philippine Army ang dili mominos sa 10 ka NPA diha sa barangay Roosevelt. Patay sa maong engkwentro si Private First Class Lowel John Bravo, 31 nga taga Barangay Aguisan, Himamaylan City, Negros Occidental.
Matud pa ni Major General Aurelio Balabad sa 3rd IB nga ilang gikondena ang maong panghitabo gumikan matud pa igo lang mitabang ang maong mga sundalo sa usa ka programa nga gilusad sa lokal nga kagamhanan sa maong dapit. Gituohang dunay nasamdan sa habig sa mga NPA tungod sa mga dugo nga nakita sa posisyon sa mga rebelde apan wa na sila maapsi.
Samtang sa Escalante gi-ambush sa NPA ang mga tropa sa 62nd IB diha sa barangay Dian-ay. Naangol si 1st Lt. Johnrey Espinosa, nga nakaangkon og samad sa iyang ulo.
Matud pa ni Major Ray Tiongson sa 3rd Infantry Battalion sa Philippine Army nga duna silay na-recover nga patay’ng lawas sa usa ka NPA ug usa usab ang naangol nga gidala na sa tambalanan. (/EIM)(BANAT NEWS)
- Latest
