Amerikano, laing 2 patay sa aksidente

CEBU, Philippines -  Patay ang usa ka Amerikano human nabangga ang gimanehong motorsiklo sa center-island sa barangay Cogon, dakbayan sa Bogo niadtong Huwebes sa gabii.

Ang biktima nailhan nga si Gary Dean Tripi, 51, ug kasamtangang nagpuyo sa Tapul, lungsod sa Tabogon.

Si Tripi gikan sa Bogo padulong untang mopauli sa Tabogon dihang nahitabo ang aksidente nga miresulta sa iyang kamatayon.Sa imbestigasyon sa kapolisan sa Bogo nasayran nga wala mag-helmet si Tripi ug nanimaho kining ilimnong makahubog.

Patay usab ang usa ka 72-anyos nga lalaki human nabanggaan sa usa ka pasaheroang jeep sa Yati, Liloan niadtong Huwebes sa gabii.

Ang biktima nailhan nga si Vevencio Balansag, nagpuyo sa maong lugar samtang ang drayber sa nakadasmag mao si Tomas Batucan, 28-anyos, taga Dunggoan, dakbayan sa Danao.

Matud ni Batucan nga nag-pick-up siya og pasahero ug pagdagan niya kalit nga milabang si Balansag gikan sa tindahan ug naigo ang abaga niini sa tuong side mirror.

Dugang ni Batucan nga nadakdak ang ulo sa biktima sa karsada.

Gibuhian si Batucan sa kapolisan tungod sa kasabutan sa tag-iya sa jeep nga si Ely Trinidad nga mogasto sa tanang gastohanan sa patay’ng lawas sa biktima. Samtang patay usab ang usa ka Carmen Barro, 54, taga Luyang, Carmen human nabanggaan sa usa ka motorsiklo sa ilang        lugar.

Nakadasmag kaniya ang motorsiklo nga gimaneho ni Dennis Abellanosa, 39, minyo, ug taga barangay Poblacion, Pardo, dakbayan sa Sugbo.

Gibuhian sa kapolisan si Abellanosa human nagkasabot ra u gang tagtungod sa biktima. (/GMR)(BANAT NEWS)