Dutch nakiglayog sa akyat bahay
CEBU, Philippines - Gilungkab sa tulo ka sakop “akyat bahay gang” ang panimalay sa usa ka Dutch pasado alas 12 sa udtong tutok sa niadtong Miyerkules sa Metropolis Subdivision, Pit-os, dakbayan sa Sugbo.
Ang biktima nailhan nga si Michael De Ruiter, 48, may asawa’ng Pinay nga nagpuyo sa maong lugar.
Asoy sa biktima nga samtang migawas ang iyang asawa sa ilang balay nakalimtan niini og sirado ang gate diin niagi ang tulo ka lalaki kinsa ang usa nagdala og kutsilyo.
Nakabantay ang biktima kinsa daling mikanaug apan imbis modagan ang mga suspek, pugsanon hinoon kining nisaka sa taas sa balay.
Nahitabo ang linayugay hangtud pa natumba ug nadunggaban sa bukton ang biktima.
Gikuha sa mga suspek ang kwarta sa biktima kantidad og P28 mil, ATM cards, passport ug uban pang importanteng gamit dayun sibat gikan sa lugar.
Matud ni Senior Insp. Bienvenido Miral, hepe sa Talamban Police Station, nga nahinabi sa Banat News nga posibleng usa ka organisadong grupo ang naghimo sa krimen.
Sumala pa ni Miral nga kursonado na gyud kaayo ang mga “akyat bahay gang” karong panahona kinsa dili na mahadlok nga mosaka og balay bisan adlawan. (BANAT NEWS)
- Latest
