4-anyos nga disabled napaso sa sunog
CEBU, Philippines - Naputos sa paso sa lawas ang usa ka 4-anyos nga bata’ng babaye human nasunog ang ilang panimalay sa sitio Highway, Cadaruhan, Borbon niadtong Miyerkules sa gabii.
Nasunog ang gi-abangan nga panimalay sa pamilya’ng Hortelano human wala matarong og palong ang kayo sa ilang kusina ug kalit nisilaob dihang nangatulog na ang pamilya. Ang biktima naila nga si Trisha Mae Hortelano, disabled child, kinsa nahabilin sa panimalay atol sa sunog.
Si Darwin Hortelano, 43, amahan ni Trisha ug lain pang lima niya ka mga igsoon ang daling nakagawas sa panimalay human napuno na sa aso ug kayo ang ilang balay ug ulahi na nga nabantayan nga wala madala ang biktima.
Matud ni SPO1 Richeleu Artesta sa Borbon Police Station nga nahinabi sa Banat News nga gidali og dala sa Sogod District Hospital ang biktima.
Hinimo sa light materials ang panimalay hinungdan nga daling midako ang kayo nga gibana-banang nagbilin og danyos nga mokabat sa P80 mil. (BANAT NEWS)
- Latest
