Gabok nga Gemelina sa Talisay gipaputol

CEBU, Philippines - Gipaputol sa kagamhanan sa dakbayan sa Talisay ang napulo ka punoan sa Gemelina nga giingong mga gabok na ug delikadong matumba.

Si Konsehal Antonio Bacaltos Jr., chairman sa committee on environment, mibutyag nga ang buhatan sa mayor mipahibawo kaniya kabahin sa nahisgutang mga Gemelina hinungdang nipasar sila og resolusyon niadto pang Hunyo.

Matud ni Bacaltos nga gipadala nila ang kopya sa naaprobahang resolusyon sa buhatan sa Department of Environment and Natural Resources-7.

Ang DENR-7 mihatag og pagtugot sa pagputol sa nahisgutang mga kahoy aron paglikay sa disgrasya.

Ang nahisgutang mga punoan sa kahoy nahimutang sa may Green Valley Garden atubangan sa City Hall ug giingong ang mga sanga nagpangatagak na.

Ang mga pinutol nga nga kahoy gibutang sa motorpool likod sa City Hall ug ipanghatag kini ngadto sa mga barangay ug eskwelahan nga nagkinahanglan.

Ang mangayo adto mananghid sa buhatan sa mayor. (BANAT NEWS)