Unom ka brgy worker sa pasil ug busay adik

CEBU, Philippines - Human sa gihimong sagunson nga drug tests sa Cebu City Office on Substance Abuse Prevention sa lain laing barangay sa dakbayan, unom na usab  ang napositibo sa paggamit sa ilegal nga drugas diha sa barangay Pasil ug Busay.

Matud ni Dr. Alice Utlang pangulo sa COSAP nga sa 76 ka barangay workers sa Pasil nga gipaubos sa surprise drug test kagahapon sa buntag lima ka buok ang positibong tiggamitan og ginadili nga drugas. Ang lima tanod, garbage loader, volunteer ug ang usa tiglimpyo sa kanal.

Matud ni Julius Guioguio barangay kapitan sa Pasil nga taktakon sa serbisyo ang lima nga nagpositibo sa drug test tungod kay ila man ning tinuyuan.

Iyang gidugang nga sa wala pa ang gihimong drug test duna na siya’y gisuspetsahang tiggamitan sa ginadili nga drugas apan gusto niyang masiguro maong siya mismo ang nihangyo nga mopahigayon ang COSAP og drug test sa ilang barangay.

Samtang sa Barangay Busay, usa ang nagpositibo gikan sa 54 ka kawani nga gi-drug test. Ang nag-inusarang napositibo usa ka tanod.

Sa pagkakaron sa 80 ka barangay sa dakbayan singkwenta pa niini ang nahuman og drug test sa COSAP ug 173 na ka buok ang nigawas nga positibo.

Daan nang miingon si Cebu City Vice Mayor Edgar Labella nga iyang ipatangtang ang si bisan kinsang kawani nga mogawas nga positibo sa drug test.

 Padayon gihapon hinuon ang gitanyag nga outpatient rehabilitation sa mga nagpositibo sa drug test. (BANAT NEWS)