Nakig ‘sex’ patay

CEBU, Philippines - Patay na nga nahidangat sa tambalanan ang usa ka 63-anyos nga senior citizen nga gituohang migamit og sex enhancement pill sa tinguhang molahutay uban sa iyang hinigugma nga 19 anyos nga dalaga, apan namatay kini.

Sumala pa ni SPO1  Allan Pantaleon sa Homicide Section sa Lapu-Lapu City Police Office (LCPO)   nga ang 19-anyos nga babayeng gikauban sa namatay sud sa usa ka motel sa Barangay Basak sa dakbayan sa Lapu-Lapu mibutyag nga  nag-check in sila  alas- 2 pasado ang takna sa hapon niadtong Martes.

Matud pa ni Pantaleon nga nahuman ang duha sa ilang lawasnong kalipay niana nang pagka-alas kwatro sa hapon. Sumala pa nga naligo una ang dalaga apan dihang gipangayo na niini ang tualya, kalit nga nikurog ug nalup-og ang 63-anyos. Tungod niini daling nangayo og tabang ang dalaga sa attendants hinungdan nga gidala kini sa Mactan Doctors Hospital apan gideklarar kining patay na. Gisugyot sa kapolisan nga ipaubos sa awtopsiya ang lawas sa namatay aron pagtino sa hinungdan sa kamatayon niini. Base sa mga impormasyong nakuha sa mga imbestigador gikan sa dalaga atol sa ilang pagsukit-sukit, si Pantaleon nagkanayon nga nagduda silang dunay gitumar ang namatay nga nakaingon sa iyang kamatayon.

Base sa pagsusi sa lawas niini, wa silay nakitang timailhan nga dunay foul play sa kamatayon niini. (BANAT NEWS)