Konstruksyon sa koral gireklamo

CEBU, Philippines - Mireklamo ang mga residente sa Nasipit, Talamban human sa giingong  pagkoral sa kanal sa usa ka residente hinungdan nga kanunay nang maglunop sa baha ang ilang lugar kun moulan.

Matud ni Arsenio Daniot Jr. presidente sa Nasipit Homeowners Association sa suwat nga iyang gipadala ni Talamban Barangay Captain Dario Arcilla nga ang pagkoral sa usa ka Beltran Rizon sa iyang yuta nga naapil ang parti sa kanal  sa ilang dapit.

Matud pa sa suwat reklamo mao kini nakaingon nga moawas ang tubig niini. Ang suwat naabot sa konseho ug girekomendar nga ipasusi kini sa Cebu City Environment and Natural Resources Office.

Sa gihimong inspeksyon sa CENRO pinangulohan ni Engr.Randy Navarro  ilang nasayran nga dunay gitukod nga tulo ka andanang building ug duna gyuy kural nga gitukod sa dapit.

Apan wala sila makakita nga dunay parte sa kanal nga naigo sa kural. “The property was indeed fenced, mostly with a colored plastic material. However, the undersigned noticed that no part of the canal was fenced, neither does the fence impeded any part or flow thereof,” matud pa sa obserbasyon sa CENRO. Ang mga residente una nang miawhag nga ipahunong ang pagtukod sa maong building ug sa kural nga nakabara sa kanal. - /EIM) (BANAT NEWS)