Census ni Yolanda ilusad sa PSA

CEBU, Philippines - Ang Philippine Statistics Authority (PSA-7) nga kanhi National Statistics Office (NSO-7) gikatakdang mohimo og census sa tanang naapektahan sa bagyong Yolanda sa amihanang bahin sa Sugbo.

Ang PSA mo-hire og 158 ka mga data encoders alang sa ilang ipahigayon nga "pilot census" sa mga biktima sa bagyong Yolanda dinhi sa Sugbo sa bulan sa Agosto ning tuiga.

Sigon pa ni PSA-Cebu provincial statistics officer, Fermo Diputado nga ang maong census himuon sa mga lugar nga gikusokuso sa bagyong Yolanda sa amihanang bahin sa lalawigan sa Sugbo. Kini gimando sa Office of the Presidential Assistance on Rehabilitation and Recovery (OPARR) nga gipangulohan ni Sec. Panfilo Lacson.

Nalakip sa ipahigayon nga census sa mga biktima sa bagyo mao ang lungsod sa Madridejos, Sta. Fe ug Bantayan sa Bantayan Island, Daanbantayan ug San Remigio ingon man sa siyudad sa Bogo.

Iyang gitug-an nga ang labing importanting kuhaon nga data gikan sa mga typhoon survivors mao ang livelihood ug housing sites niini sa wala pa ug human na sa pag-igo sa bagyong Yolanda, housing unit, garbage disposal, tinubdan sa supply sa tubig ug uban pa.

Matud pa ni Diputado nga prayoridad nilang dawaton nga data encoders mao ang mga nakatungtong sa 2nd year sa college gikan mismo sa mga lugar nga apektado sa bagyo.

Sila suholan og P289.00 matag adlaw gikan sa Agosto 4 hangtud sa Agosto 30 ning tuiga. Human sa survey ang maong data isumiter ngadto sa OPARR sa dili pa matapos ang tuig. Dugang pa niini nga kinahanglan nga mokooperar ang tanang molupyo sa maong mga lugar sa naasoy nga census tungod kay ang bag-ong balaod mahimo silang pamultahon og P10 mil kun magdumili sa pagtubag sa census survey form. - /EIM) (BANAT NEWS)