PO2 Las Piñas hayan mataktak–IDMB

CEBU, Philippines - Mohimo og imbestigasyon ang Investigation Detection and Management Branch (IDMB) sa Cebu City Police Office (CCPO) batok sa usa ka polis nga nasikop sa gihimong entrapment operation sa National Bureau of Investigation (NBI 7), sa miaging  adlaw.

Sumala pa ni Chief Inspector Aileen Recla ang hepe sa IDMB nga nahinabi sa mga tigbalita gipaabot pa nila nga pormal nga mapasakaan og kasong extortion si PO2 Joselito Las Piñas.

Matud pa ni Recla nga sa kabahin sa IDMB ang kasong administratiba ang ilang pwede’ng mapasaka batok sa maong polis, diin kung kini mapamatud-an nga guilty sa iyang kaso, posibleng matangtang kini sa serbisyo. Sa record sa IDMB, wala’y pending nga kaso si PO2 Las Piñas sa bisan unsa nga matang sa reklamo batok niya, apan sa iya karon nga giatubang nga reklamo matud pa ni Recla nga daku ang tsansa nga matangtang kini sa pagkapolis kun mamatud-ang sad-an.

Matud pa ni Recla, daku nga leksyon nga di nalang mosuway og himo sa bisan unsa nga binuang sa ilang trabaho. -/EIM) (BANAT NEWS)