Luna sa SRP ibaligya na

CEBU, Philippines - Nagtinguha ang kagamhanan sa dakbayan sa Sugbo nga mobaligya og luna sa South Road Properties (SRP) karong tuiga aron dili mausik ang buhis nga kitaon niini.

Matud ni Atty. Jose Daluz III, executive assistant sa buhatan ni Cebu City Mayor Michael Rama, nga angay na nga ibaligya ang luna sa SRP tungod kay daghan na nga mga establisemento ang hinay-hinay nga nibarug sa SRP.

Gihulagway ni Daluz nga gawas sa buhis nga kitaon daghan usab ang makatrabaho tungod kay daghan namang negosyo nga tukuron sa SRP.

Gihangop ni Daluz ang gipasar nga resolusyon ni Konsehal Eugenio Gabuya III nga maggahin og napulo ka ektaryang luna sa SRP alang sa katukuran sa multi-sports facility.

Hinoon si Daluz mitataw nga ilang paabuton si Rama kalabot sa daghang tanyag sa mga investors nga mopalit og luna sa SRP.

Kahinumduman nga ang Robinson Land Corporation ug AM Prime Holdings Inc. mipadala og suwat sa buhatan sa mayor labot sa ilang tinguha nga makakuha og luna sa SRP labi na sa Lot 8-B nga nahimutang duol sa templete ni San Pedro Calungsod. -  /GMR) (BANAT NEWS)