Pushers nasakmitan og drugas, armas

CEBU, Philippines- Nadakpan sa mga sakop sa City Anti-Illegal Drugs Special Operation Task Group (CAIDSOTG) sa Lapu-Lapu City Police Office (LLCPO) ang usa ka batan-ong pusher sa buy-bust operation sa sitio Seaside, Pusok sa niaging adlaw.

Si Insp. Judith Besas nga maoy nangulo sa operasyon miila sa nadakpan nga si Ravi Agusto Ybañez alyas Buloy, 19-anyos kinsa nasakmitan og duha ka dagku ug tulo ka gagmay’ng pakete sa shabu, mga drug paraphernalia, cellphone,  P200 nga marked money ug P700 nga gituohang halin sa gipamaligya nga shabu. Samtang laing duha ka pushers ang nasikop sa gipahigayong buy-bust operation sa lungsod sa Tudela ug Dumanjug sa niaging Domingo. Si Jason Pansacala alyas Jimboy, 18, taga Northern Poblacion, Tudela nasakmitan og tulo ka pakete sa drugas, usa ka .38 revolver ug duha ka bala, sa may Rizal St., Southern Poblacion.

Ang giingong iladong pusher nga si Ricky Angana, 33, ang nasikop usab sa kapolisan sa Dumanjug kinsa nasakmitan og usa ka ,22 black widow revolver nga may upat ka bala ug duha ka paketeng shabu samtang nagpaabot og kustomer sa  barangay Lawaan.

Matud ni Senior Insp. Narciso Abapo nga adunay pending warrant mahitungod sa pagpamusil si Angana ug apil usab sa mga watchlists sa maong lugar. (Thea Deseree Ceniza, USJR Masscom Intern ug Romeo T. Limpangog/GMR) (BANAT NEWS)