Notadong “level 3” drug pusher nasikop
CEBU, Philippines - Gisikop sa Waterfront Police Station ang usa ka level 3 drug pusher sa sitio Palma, San Roque, dakbayan sa Sugbo alas dos pasado kagahapon sa kadlawon.
Ang dinakpan naila nga si Manolo Salvador Jr., 32, ulitawo ug nagpuyo sa maong lugar.
Ang search warrant giluwatan ni RTC Branch 19 Judge Wilfredo Navarro batok kang Salvador. Si Sr. Insp. Wayne Magbanua , hepe sa Waterfront Police Station nga maoy nangulo sa pagsilbi sa search warrant miingon nga wala na kalihok si Salvador human nakaplastar na’ng daan ang kapolisan gawas sa iyang panimalay.
Nakuha sulod sa panimalay ni Salvador ang 19 ka gagmay’ng pakete sa gituohang drugas diin ang operasyon gisaksihan mismo sa kapitan sa barangay nga si Lidiore “Boy” Miranda.
Matud ni Miranda nga nahinabi sa Banat News nga notado na gyud nga drug pusher sa maong lugar ang dinakpan ug gani gi-warningan na si Salvador kaniadto pa nga moundang na sa iyang ilegal nga negosyo. (BANAT NEWS)
- Latest
