Internet cafés, “piso-piso” ipa -regulate

CEBU, Philippines -  Usa ka ordinansahon ang giduso diha sa Hunta Probinsyal sa lalawigan Sugbo nga nagtinguhang ma-regulate ang mga coin-operated nga mga internet café ug computer shops dinhi sa lalawigan.

Tinguha sa maong ordinansa ni Board member Miguel Antonio Magpale nga maprotektahan ang mga minor de edad gikan sa mga bayolenteng duwa sa kompyuter ug labi na sa mga pornographic websites. 

Sa maong ordinansa, gimando sa mga computer shops ug internet cafés nga magmugna og blocking system batok sa mga pornographic ug violent sites.

Gawas niini, kinahanglan usab nga magbutang ang mga internet café og pahimangno nga alang sa mga minor de edad nga dili moduwa sa oras sa tingklase.

Gimandoan usab ang mga local government units nga himuong pre-requisite sa pagbag-o sa business permits sa mga internet café ang pagmugna og filtering system alang sa mga pornographic ug violent computer gaming sites.

Gikinahanglan usab nga moluwat og certificate of exemption ang mga nagdumala sa eskuylahan alang sa mga estudyanteng magbuhat og school-related research sulod sa oras tingklase.   Ang mga tag-iya sa mga computer centers ug internet café nga mapamatud-ang milapas sa maong ordinansa pamultahon og P1, 000 sa unang paglapas, P3, 000 sa ikaduha, ug P5, 000 ug pagbakwi sa business permit ug lisensya. (BANAT NEWS)