Saba nga tambutso

CEBU, Philippines - Daghang tag-iya og mga motorsiklo ang gipangkulbaan tungod kay nagsugod na ang Land Transportation Office (LTO) pagpanakop sa mga drayber og motorsiklo nga saba kaayo og tambutso.

Ang ubang tag-iya og mga motor mituyo sa pag-ilis sa tambutso sa ilang sakyanan aron mokusog ug mohagubhob ang andar  sa motorsiklo sa walay paghuna-huna nga sabaan ang mga tawo nga makadungog.

Gani adunay mga tagdumala og subdivision nga dili mopasulod og motorsiklo nga saba kaayo ang tambutso kay makatugaw kini sa pagkatulog sa mga molupyo, ilabi na panahon sa gabii. Kadtong mga motorista nga madakpan tungod sa kasaba sa ilang mga tambutso hayan makabayad og P15 mil nga multa base sa kalapasan sa lagda sa Presidential Decree 96.

Ang kadagkoan sa Land Transportation Office (LTO) wala makasabot ngano’ng samtang kadaghanan sa tag-iya’g sakyanan gusto nga dili makamugna og kasaba ang ilang motor, apan ang uban tuyoon g’yud aron ang ilang motorsiklo makamugna og alingog-ngog. (BANAT NEWS)